„Во недостиг на информации, ВМРО-ДПМНЕ веќе цела недела одржува беспредметни прес конференции против градоначалникот на Општина Центар, Андреј Жерновски. Господине Горан Богдановски во иднина, пред да застанете пред општината и да критикува, треба да се информирате.
Ја спомнувате гасификацијата, ние ве потсетуваме дека гасификацијата не е реализирана од страна на градоначалникот Андреј Жерновски затоа што тогашната Влада на ВМРО-ДПМНЕ и ваша матична партија донесе одлука процесот на гасификација да оди исклучиво преку Град Скопје.
Па така вашето обвинување за „неспособност” можете да го упатите до вашиот сопартиец и градоначалник на Град Скопје, Коце Трајановски, кај кого се ингеренциите за спроведување на процесот на гасификација.
Што се однесува до реализација на капиталните проекти Општина Центар, за првпат по 42 години изгради нова градинка со површина од 2800 метри квадратни, а по 47 години ново основно училиште. Обновивме 78 000 метри квадратни зеленило и реконструиравме улици со вкупна површина од 52 000 метри квадратни. Голем дел од буџетот го пренасочивме за директна помош на граѓаните.
Ова се само дел од проектите кои ги реализираше општина Центар, за сите други може да го разгледате отчетот.
И за крај да ве потсетам дека општина Центар не се кити со туѓи перја. Општина Центар за сите овие проекти доби нула денари владина подршка. Сите средства беа издвоени од сопствениот буџет на општината.
Бидете убедени дека на 15 октомври, токму ваквиот чесен и транспарентен начин на работа граѓаните ќе го ценат и препознаат“, се вели во реакцијата на Општина Центар.