Министерката за одбрана Радмила Шекеринска денеска ќе ја отвори работилницата за проектот на НАТО – СИАРС за развој на современ медицински информациски систем.
Организатор е Воената академија „Генерал Михаило Апостолски“ во Скопје, која покрај наставна дејност учествува и во научно-истражувачки проекти, меѓу кои во финална фаза на реализација е SIARS (Smart I (eye) Advisory Rescue System). Се работи за тригодишен проект финансиран од НАТО програмата „Наука за мир и безбедност“.
СИАРС се состои од развивање информациски системи во нов и современ телемедицински информатички систем со кој ќе се овозможи постојан трансфер на виталните знаци на живот за војниците, вип-личностите или цивилите на боиштето. Системот преку сензори за мерење на витални параметри на секој војник преку посебен алгоритам го пресметува степенот на ризик по здравјето и ја класифицира состојбата на секое лице опремено со овој сензор.
Податоците директно се пренесуваат и во тактичкиот оперативен центар, кој е директно запознаен со состојбата на војниците. Со овој систем значително ќе се влијае на подобрат можностите за спасување на војниците во бојното поле, а тој и ќе помогне во планирањето на соодветна евакуација и минимизирање на ризиците, транспортот и медицинската грижа потоа.
Покрај Воената академија, учесници во проектот се тимови од факултетите за електротехника и за медицина од Универзитетот од Љубљана и Факултетот за информатички науки и компјутерско инжинерство од Универзитет „Св. Кирил и Методиј“ од Скопје.
На отворањето на работилницата, која ќе се одржи во касарната „Гоце Делчев“, ќе се обратат амбасадорите на Словенија и на Хрватска во Македонија, Милан Јазбец и Данијела Баришиќ, и деканот на Воената академија, полковник Орце Поповски.