Со едноминутно молчење за брутално убиениот Мартин Нешкоски, а со цел запирање на полициското насилство, неколку стотини млади луѓе, излегоа на улиците низ Скопје за да го изразат својот револт против однесувањето на институциите.
Извикувајќи „Нема правда нема мир“, „Пробавте да скриете“, „МВР под истрага“, младите се упатија кон полициската станица Беко, каде што се судрија со полицијата.
Барајќи оставка на Министерката за внатрешни работи, Гордана Јанкуловска и нејзиниот помошник, Иво Котевски, групата тргна кон МВР. Овде, уште еднаш беше ограничено нивното движење.
Покрај активистите на здружението „Стоп за полициската бруталност“, поголем број граѓани и невладини организации се придружија на протестниот марш. Сите побараа одговорност од институциите и случајот со Мартин Нешкоски никогаш да не се повтори.
Серијата граѓански протести за запирање на полициската бруталност, започна лани, откако припадник на полицијата го уби Мартин Нешкоски за време на прославата на изборната победа на ВМРО-ДПМНЕ.
Надлежните, тогаш, случајот неколку дена го криеја од јавноста. И една една година подоцна, револтот на младите луѓе кон полициската бруталност, сеуште расте.
Јасмина Јакимова