Здружението на граѓани „За нас се работи“ од Битола, вечерв организираат протестен марш против големото загадување на воздухот во градот.
На фејсбук страницата, групата со наслов „Битола сака чист воздух“, има повеќе од 11 илјади членови.
Почетокот на маршот е во 18,45 часот, од споменикот на Стив Наумов, преку Широк Сокак, во 19 часот се пристигнува до Народниот театар – Битола, каде во тоа време по повод Денот на ослободувањето на градот 4.Ноември, ќе започне свеченоста за доделување на наградите на годинешните добитници.
Идејата на организаторите е да го свртат вниманието на релевантните личности и фактори кои одлучуваат за важни прашања за граѓаните на Битола, а кои вечерва, ќе присуствуваат на манифестацијата.
Денеска, точно на пладне, членовите на иницијативниот одбор на здружението „За нас се работи“ положија цвеќе пред мерната станица „Битола 2“ која подолго време не работи и претставува „споменик во името на екологијата“.
Во текот на денот се отворени канцелариите на Здружението, во кои ќе биде поставена изложба на фотографии кои поддржувачите на групата „Битола сака чист воздух“ во изминатите два месеца ги испраќале на социјалните мрежи.