По најавената реформа од Министерството за образование дека во втора и четврта година на факултетите ќе се полага државен испит, студентите вечерва во 18 часот со собир ќе го искажат својот револт од новата мерка.
-Слободен собир, дискусија и организирање на автентична студентска организација која ќе се бори против екстерното тестирање на студентите. Се работи за тебе, мене и сите студенти кои сме засегнати од екстерната небулоза, се вели во повикот за протест пред споменикот на Св. Кирил и Методиј кој се наоѓа пред Правниот, Економскиот и Филозофскиот факултет.
Министерот за образование Абдулаќим Адеми веќе објасни дека оние студенти кои нема да го положат државниот испит во втора година, нема да можат да продолжат со студирањето, а на тој начин ќе заштеделе време и пари.
И премиерот Никола Груевски вчера потврди дека ќе се воведе проверка на знаењето на студентите, зашто сега лесно добивале високи оценки, кои не соодветствувале на нивното знаење.
На Фејсбук групата „Не за државни испити за студентите“ каде е објавен повикот за протест, досега се приклучиле над 4800 членови.
СТОП за уништувањето на образованието, за понижување и уништување на универзитетите и нивната автономија, пишува на страната и се повикува на масовност како што тоа го прават студентите во регионот.