Минатата недела, на 27 и 28 јули во селото Долно Дупени во близина на Ресен, полицијата пронашла череп и остатоци од човечки труп во распаѓање.
Пронајдените остатоци од телото биле подигнати и по наредба на битолското Јавно обвинителство биле предадени на обдукција, каде што се утврдило дека смртта била насилна, со испукување проектил од огнено оружје во задниот дел на главата.
„Извршена е и идентификација на жртвата, и се утврди дека се работи за лицето М.А. (53) од околината на Скопје. Како резултат на преземените истражни дејствија се утврди дека делото е сторено на ден 30.06.2020.година, а како сторител на делото е осомничено лице од Скопје“, известуваат од МВР.
Врз основа на резултатите од истрагата, битолското обвинителство побарало, а судијата на претходна постапка одобрил на осомничениот да му се определи мерка притвор, а против него е поднесена кривична пријава за убиство.
Случајот го водело Одделението за криминалистичка полиција, во соработка со Единицата за крвни и сексуални деликти од Секторот за општ и насилен криминал во БЈБ и Одделението за крвни и сексуални деликти – СВР Скопје во соработка со ОЈО Битола.
Од МВР известуваат дека на случајот се уште се работи, односно се расветлува мотивот за убиството.