На градскиот плоштад во Гевгелија со вечер со почеток во 19 часот ќе се одржи промотивен концерт на воениот оркестар на АРМ. Припадниците на баталјонот за почести ќе ја изведат точката „ЕГЗИРЦИР“ со која ќе демонстрираат висока строева извежбаност во работа со пушка.
Воениот оркестар во траење од околу еден час пред граѓаните на Гевгелија ќе се претстави со филмска музика, обработена за оркестарска изведба.
Со овој промотивен концерт на воениот оркестар во Гевгелија, АРМ продолжува со реализацијата на проектот за соработка со локалната самоуправа во Република Македонија за 2014 година, чија основна цел е низ дружење Армијата да се доближи до граѓаните и во градовите каде АРМ нема гарнизони.
Во текот на минатата година воениот оркестар имаше успешен настап во Битола, Прилеп, Струга, Охрид, Радовиш и Струмица, а на крајот од годината се одржа и Новогодишен концерт во Домот на АРМ во Скопје. Во 2014 година воениот оркестар и припадниците на баталјонот за почести настапија во Македонски Брод и Делчево, а во наредниот месец е планирано да гостуваат во Крива Паланка.
