Секторот за урбанизам, комунални дејности и заштита на животната средина и природата при општина Куманово, соопшти дека од 2 мај ќе почнат градежни работи – попречни приклучоци, на ул.„Перо Шварц“ и ул.„Среќко Пужаљка“, кои се реализираат во рамки нa ИПА – проект „Рехабилитација и проширување на канализациона мрежа во општина Куманово“.
– За краткиот период додека се изведуваат градежните работи на овие локации, сообраќајот ќе биде блокиран со цел што е можно побрзо да се изведат градежните зафати. Воедно, ги замолуваме граѓаните да ги отстранат моторните возила од улиците, како и да соработуваат со цел непречено одвивање на работите, стои во соопштението од секторот за урбанизам.
Претходната недела во рамки на проектот градежни активности се спроведуваа на улиците „Перо Чичо“, „Кирил и Методиј“, „Трета Македонска ударна бригада“, „Љупчо Арсов“ и „Чупино Брдо“.
Проектот „Рехабилитација и проширување на канализациска мрежа во општина Куманово” вреден 4,3 милиони евра беше промовиран во октомври минатата година и со него е предвидено да се решаваат проблемите со собирањето и одведувањето на урбаните отпадни води во општина Куманово.
Со овој проект се очекува да се рехабилитираат околу 25 километри од постоечката канализациска мрежа во Куманово.