Претседателот Ѓорге Иванов од денеска до петок ќе престојува во Руската Федерација каде што ќе учествува на шестиот Меѓународен форум „Мир и спорт“ што се одржува во Сочи.
Како еден од главните говорници, претседателот Иванов ќе се обрати на свечената церемонија на отворањето на форумот што и годинава се одржува под покровителство на принцот Алберт Втори од Монако.
На форумот е најавено учество на повеќе од 700 делегати од стотина држави, меѓу кои политички лидери, бизнисмени, претставници на меѓународните организации, граѓанското општество, Меѓународниот олимписки комитет и спортисти.
Претседателот Иванов втор пат учествува на овој форум. Минатата година тој присуствуваше на форумот што се одржа во Монако.
Меѓународниот форум „Мир и спорт“ е инициран во 2007 година со цел да придонесе кон одржување и негување на мирот во светот преку спортот, односно поттикнување на соработката и размена на искуства во насока на креирање иницијативи преку кои спортот ќе биде ставен во функција на мирот.