Полицијата во координација со ОЈО ГОКК утрово на повеќе локации врши претреси, а има и приведени повеќе лица, потврдија за А1 од МВР.
Како што дознаваме претресите се сите во Скопје и околината на скопско, а меѓу уапсените има и инспектори од УЈП, екс директор, сметководители и бизнисмени. Неофицијално дознаваме дека се работи за над 10 лица, но од МВР и Обвинителството официјални информации најавуваат дури откако ќе завршат претресите и акцијата. А се со цел да се избегне одредени лица да уништат докази или да се дадат во бегство.
Акцијата се одвивала подолго време од страна на Одделот за сузбивање на организиран криминал и корупција во МВР. Осомничените како што дознаваме се товарат за повеќе дела – „злосторничко здружување“, „злоупотреба на службена положба“, „затајување на данок и перење пари“. Но се уште нема детали кој од уапсените за кое дело ќе се товари.
Според некои информации групата го оштетила буџетот за околу 1 милион евра. А осомничени освен физички лица се и фирми кои учествувале во затајувањето.
Според непотврдени информации уапсени се и екс заменик директорот на УЈП, функционер на ДУИ Исмет Гури. Минатата недела Гури беше осуден на 3 и пол години затвор за изборни злоупотреби во случајот Титаник 3.