Судијката Даниела Алексовска Стојановска, го одложи првото рочиште за предметот на СЈО „Талир 2“ за незаконската градба на седиштето на ВМРО-ДПМНЕ. Причина за одлагањето е што не дојдоа ниту адвокатите на Никола Груевски и на Кирил Божиновски, ниту обвинетиот Божиновски.
Адвокатите го известиле судот дека се спречени да присуствуваат на рочиштето поради присуство на друго рочиште, и поради патување во странство. На судењето немаше присутен ниту обвинител од СЈО. И двете страни побарале од судот одлагање на судењето.
Следното рочиште е закажано за 19 септември.
Во „Талир 2“ се обвинети се бегалецот Никола Груевски и ексгенералниот секретар на Владата, Кирил Божиновски. Според СЈО, тие злоупотребувајќи ја службената положба, овозможиле правното лице ДГ Бетон АД Скопје да го изгради седиштето на политичката партија ВМРО-ДПМНЕ, во времето на обезбедување на услугата, фирмата имала склучено договори за јавни набавки со државни органи и јавни установи или претпријатија спротивно на Законот за политички партии, Законот за финансирање на политички партии и Законот за облигациони односи.
Пред судот веќе се води постапка за предметот „Талир“ за незаконско финансирање на партијата ВМРО-ДПМНЕ. Според обвиненителниот акт од СЈО, обвинетите во „Талир“ незаконски добиле најмалку 4,6 милиони евра за партијата, а потоа организирале тие пари да бидат уплатени на жиро-сметката на партијата преку уплатници на разни луѓе.