Поради коронавирусот, на денешната прес-конференција во Владата и за новинарите кои присуствуваа на обраќањето на техничкиот премиер Оливер Спасовски имаше предвидено посебни мерки.
Па така, столчињата предвидени за новинарските екипи беа раздалечени едни од други на околу еден метар растојание, а микрофонот не се подаваше на секој новинар кој сака да постави прашање, туку за тоа имаше задолжено посебно лице од Службата за односи со јавност.
Новинарите прашуваа и како ќе тече понатамошната комуникација со владините претставници и изразија загриженост во однос на одржувањето на прес-конференциите.
„Нема никаков проблем во овој дел. Јас го разбирам стравот и претпазливоста. Јас веќе дадов задача уште утринава да разгледуваат дали може да се прават прес-конференција преку скајп комуникација и на кој начин да се информираме. Се што треба да биде превземено во оваа насока, да се направи. Секој предлог кој го имате треба да се разгледа“, рече Спасовски.
