Пратеничката и лидер на ДОМ Лилјана Поповска денеска на прес-конференција рече дека нејзината изјава во врска со немилите настани во Собранието била злоупотребена и извадена од контекст.
– Во мојата изјава повикав на разум, одговорност и почитување на институциите зашто Македонија е наш заеднички дом и треба да го зачуваме, напомена Поповска.
Таа побара, кога некој ја прозива, да објасни со кој дел од она што го кажала или со кој збор не се согласува наместо, како што рече, тоа да го употребува за да фрла прашина в очи со цел да се дефокусира дебатата од суштинските прашања.
– Во зовриената политичка ситуација имавме и насилство и повик за уривање на државата. Јас се борам и ќе се борам со двете, како досега. Секогаш сум се водела од принципите за општо добро, правичност и интерес на Македонија, посочи Поповска.