Одговор на меморандумот испратен од грчките власти формално ќе следи многу брзо, тврди министерот за надворешни работи Никола Попоски. Одговорот веќе бил подготвен, но Попоски не сакаше да каже каква е неговата содржина.
Шефот на дипломатијата, сепак, потенцираше дека Македонија бара почитување на неселективен начин на сите обврски преземени од минатото и целосната посветеност на дијалогот.
„Мораме да се фокусираме на она што значи главна идеја во рамки на заедничката цел, а тоа е интегрирање во ЕУ. Од наша страна ќе се потрудиме максимално позитивно да одговориме на секоја иницијатива кон приближување на таа заедничка идеја и секоја земја во нашиот регион има интерес да придонесува кон реализација на таа идеја“, изјави Попоски.
Грција во меморандумот побара решението за спорот со името да се бара во „име со географска одредница за севкупна употреба“, на што министерот Попоски кажа дека највисокото правно тело на ОН се има произнесено по однос на правата и обврските и нивното почитување.
„Во делот на обврските преземени од Македонија, оценката е дека секогаш сме ги испочитувале нашите обврски и дека исклучително проактивно сме пристапувале кон секоја обврска вклучително и кон отворениот дијалог кој сакаме да го имаме со сите соседи и со Грција“, рече Попоски.
Тој додаде дека македонскиот пристап бил конструктивен и принципиелен. За решавање на прашањето за името во рана фаза од пристапните преговори со Унијата, министерот одговори дека процесот на интеграција во Европската Унија мора да биде фиксиран врз оние правила кои се дадени во правната рамка на Унијата, која немала никаков интерес да комбинира билатерални прашања со прашања поврзани со динамиката на интегрирањето.