Ниту една фирма не ги исполнила критериумите на тендерот за набавка на респираторни машини и истиот е поништен, изјави на денешната прес-конференција Венко Филипче.
Тој рече дека ниту еден од економските оператори не можел да го задоволи критериумот за итност на набавката, па од тие причини постапката е поништена. Тендерот повторно ќе биде повторен преку Владата.
Сепак, Филипче вели дека во моментов државата не се соочува со проблем на респираторни машини, бидејќи и светските искуства говорат дека само 5 проценти од пациентите имаат потреба да бидат ставени на апарати за дишење.
Во земјава, од сите 85 детектирани случаи, само една пациентка, првозаразената од Дебар е на респираторна машина и таа е во критична состојба, непроменета од вчера.
Засега во земјава, според Филипче, на располагање се 120 респираторни машини.