Денеска хеликоптерот Бел 412 од Одделот за воздухопловни единици на МВР и хеликоптерот Х215 од хеликоптерската единица на Српското министерство за внатрешни работи дејствуваа на пожарот кај с.Косел, охридско, соопшти МВР.
Во 29 циклуси хеликоптерот Бел 412 исфрлил над 43 тони вода, со што дел од краците на пожарот биле ставени под контрола.
Денеска се активни 8 пожари во државата, информираше претходно директорот на Центарот за управување со кризи (ЦУК), Стојанче Ангелов.
Најтежок е пожарот во атарот на селото Брезница, село Тажево во Македонски Брод, кој му се заканува на селото Брезница, но Ангелов е убеден дека селото ќе биде одбрането.
„Овде во текот на целиот ден дејствуваат неколку хеликоптери, ефектите од нив се мали но тука се наоѓа 40-член унгарски тим пожарникари кои даваат голем придонес со поддршка од 50 македонски професионални војници“, изјави Ангелов.
Вториот тежок пожар е на територијата на Општина Демир Хисар, на Илинска планина, каде што ситуацијата е тешка, а во гаснењето активно учествува локалното население, локалните пожарникари, претставници од Национални шуми, но самата вегететација, како што велат од ЦУК, создава чад и го отежнува функционирањето на воздухопловите.