Полицијата пресече меѓународен канал на недозволена трговија со марихуана, при што пронајде и заплени 143 килограми и 726 грама марихуана и околу 700 грама непозната прашкасата материја која служи за мешање со хероин. Марихуаната од Албанија преку Македонија требало да заврши на пазарот во Швајцарија.
Запленетата марихуана при продажба на нарко пазарот во Швајцарија би достигнала цена приближно 600 илјади евра.
Во акцијата полицијата во скопско Ченто и во село Арачиново, вчера попладнето привела четири лица, македонски државјани, а по едно се трага.
До Основното Јавно обивнителство за гонење организиран криминал и корупција ќе биде поднесена кривична пријава за 6 лица од Скопје за сторено кривично дело „неовластено производство и пуштање во промет на наркотични дроги, психотропни супстанци и прекурсори“.
Како што појасни на денешната прес-конференција министерката за внатрешни работи Гордана Јанкулоска, според досегашните сознанија, две од лицата се дел од поголема криминална група инволвирани во извршување активности од областа на недозовлена трговија на марихуана и хероин.
Во „Ченто“, појасни таа, полицијата сопрела и прегледала две патнички возила „голф“ со скопски регистарски таблици и „мерцедес“, со пробни регистарски таблици управувани од двајца скопјани на возраст од 30 и 37 години. Во „голфот“ се пронајдени 65 пакувања во правоаголна форма, додека во „мерцедесот“ при прегледот во багажниот простор се пронајдени 33 пакувања во правоаголна форма.
– Пронајдените 98 пакувања се одземени со потврда, а лицата се лишени од слобода, рече министерката за внатрешни работи Гордана Јанкулоска.