Педесетина студенти од Турција кои студираат на универзитетот „Гоце Делчев“-Штип денеска на Градскиот плоштад во Штип додоа поддршка на граѓаните на сирискиот град Кобане, кои веќе 27 дена се под закана на терористите од Исламската држава.
Студентот Мерул Акин на македонски јазик упати апел до меѓународната заедница и Турција да се заложат и да престанат злоделата во сирискиот град Кобане.
– Терористичката група на ИД дава лоша слика кога е во прашање исламот, што воопшто не е точно. Поради нивните злодела, секојдневно умираат илјадници невини граѓани. Затоа, со овој проглас упатуваме јавен апел до целиот свет да се заложи да им застане на патот на терористите и да им каже стоп за нивните злодела, рече Акин.
Студентите прогласот го прочитаа на турски јазик, а воедно скандираа „Да живее Кобане, да живеат неговите граѓани“. Покажаа и вознимирувачки фотографии на кои се гледаат масакрите кои ги направиле терористите на ИД. Поголемиот дел од студентите кои денеска беа на штипскиот градски плоштад рекоа дека се Курди, како што се и поголемиот дел од граѓаните на Кобане.