Кандидатот за градоначалник на Гевгелија од СДСМ и коалицијата „Живот во Македонија“ Сашо Поцков денеска на средбата со жителите на Милетково и Смоквица, вети нов проект – „зелена нафта“ за земјоделците.
Реализацијата на мерката, како што напомена Поцков, ќе почне веднаш по преземањето на локалната власт.
– Земјоделците ќе плаќаат двојно пониска цена за нафта за потребите на земјоделската механизација намето редовната цена на нафтата за товарните возила. Тоа на годишно ниво ќе ја чини државата 5,7 милиони евра. Наместо субвенционирање на веќе постојните бизниси, Владата предводена од СДСМ истите средства ќе ги насочи за проектот „Зелена нафта“, која ќе значи помош за 180.000 земјоделци колку што се регистрирани во нашата земја, потенцира Поцков.
Тој, воедно, побара од своите сограѓани да гласаат за него и Коалицијата предводена од СДСМ со што, рече, ќе обезбедат услови за остварување на програмските заложби за поддршка на земјоделството и рурален развој на, според него, заборавените македонски села.
