Во гевгелиската гимназија „Јосиф Јосифовски“ денеска почнаа активностите од проектот „Превенција од илегална миграција“, што го реализира Регионалниот центар за гранични работи Југ од Кавадарци во соработка со министерствата за внатрешни работи и за труд и социјална политика, со поддршка од мисијата на ОБСЕ.
Проектните активности се реализираат во форма на едукативни работилници кои, освен во Гевгелија како пилот град, ќе се организираат уште во 20 средни училишта во Македонија.
Целна група на проектот се учениците од трета и четврта година, како и нивните наставници и родители.
– Целта на проектот е јакнење на превентивната улога на полицијата преку проактивниот пристап на соработка со заедницата, делување на свеста на учениците како најранлива категорија потоа оневозможување односно одвраќање од можноста за илегална миграција во потрага за учење, студирање или работа во странство и нивно упатување кон начините на легална миграција, истакна во своето излагање Ивица Дуков, Виш полициски советник во Регионалниот центар за гранични работи Југ.
Презентери на темата беа инспектори по превенција и илегална миграција, а на прашања од учениците одговараа претставници на Министерството за труд и социјална политика.