Во организација на Македонската православна црква Охридска архиепископија, Повардарска епархија, во чест на православниот христијански празник „Св.Маченичка Параскева-Петка“ пред новоизградениот храм во Кавадарци се изврши водосвет и благословување на почетокот на фрескоживописот.
Беше отслужена света Божествена литургија во црквата „Свети великомаченик Димитрија“ по што на платото пред новата црква „Св. Преподобна Параскева-Петка“ се изврши чинот на водосветот и благословувањето од страна на високи свештени лица од Повардарската епархија во сослужение со свештеници од храмот Св. „Димитрија“ од Кавадарци.
– Овој објект ќе го одбележи времето во кое живееме, нашите намери, тежнеења и достигнувања, ќе оставиме духовна порака за нашите поколенија на целиот македонски народ, рече Трајче Грков од Кавадарци, архитект на новата црква.