По четири и пол часовната средба во Ректоратот на УКИМ, на која присуствуваа ректорот Велимир Стојковски, министерот за образование и наука Абдилаќим Адеми, вицепремиерот Зоран Ставревски, претставниците на Студентскиот пленум и од Професорскиот пленум , извесно е само дека ќе има нова средба.
На новинарите, ректорот Стојковски им подели штуро соопштение во кое пишува дека бил донесен заклучок да се формира работна група со претставници од сите засегнати страни, вклучително и од пленумите, која во рок од 30 дена треба да изготви анализа на состојбите врз основа на која ќе се дефинира концептот на изработка на законски текст за високото образование.
Ова соопштение беше единствениот официјален став за средбата, изјава не даде никој.
Студентскиот пленум ќе објави соопштение по координацијата во пленумот.
Претставниците од УКИМ и од пленумите останаа во салата и откако владините претставници заминаа.