Денешниот Меѓународен ден на студентите ги обедини академските граѓани повторно да излезат на протестен марш, барајќи подобрување на студентскиот стандард. Маршот ќе започне пред Владата, каде веќе се собираат студентите, а предвидено е да заврши пред Министерството за образование и наука.
Тука, ќе ги истакнат своите барања за издвојување на пари од буџетот за подобри услови во студентските домови, изземање на студентите од антикризните мерки, целосно спроведување на законот за студентски оброк и зголемување на сумата на 150 денари дневно, изедначување на стипендиите, подигнување на квалитетот на образованието и негова дигитализација.
Неколку часа пред почетокот на маршот, од движењето „Студентски отпор“ ги повикаа средношколците, професорите, деканите и ректорите да им дадат поддршка, додека на политичарите им порачаа дека не се добредојдени.
