Бугарија нема повисок интерес од тоа да има мир на Балканот и се залага за траен и одржлив мир и добрососедство, изјави поранешниот бугарски претседател Росен Плевнелиев, коментирајќи го развојот на бугарско-македонските односи.
Росен Плевнелиев, кој беше претседател на Бугарија во периодот од 2012 до 2017 година, тоа го изјави во „Денот започнува“ на Бугарската национална телевизија.
Според Плевнелиев, Бугарија има историска шанса да биде патот по кој Европската унија ќе се прошири, а Македонија треба да влезе во Европа, но најголем нејзин проблем, како што рече, е идеологијата на македонизмот.
– Тоа е една целосно антибугарска идеологија, која нас не прави фашисти. Тоа е една идеологија на бришење, тоа е една идеологија на манипулирање на историјата. Бугарија треба да излезе и јасно да каже дека ние сме за обединета и неделива Македонија. Тоа е една млада држава и ние треба да и помогнеме да оди напред. Бугарија нема потреба од повеќе територија, Бугарија е за тоа границите да паднат, а не да се поместуваат. Бугарија е за траен и одржлив мир и добрососедство, изјави Плевнелиев.
За Плевнелиев потпишувањето на договорот за добрососедство со Македонија ќе претставува сигурна основа за развој на меѓусебните односи и напорите во таа насока треба да бидат поздравени.
– За мене нема повисок интерес од тоа да има мир на Балканот, бидејќи тоа е наш заеднички дом. За да има мир на Балканот, Бугарија треба да покаже европски пристап, бидејќи европскиот проект е сојуз за мир, бидејќи европскиот пристап е базиран на вредности за мир, граѓански права и слободи, изјави Плевнелиев.
Плевнелиев, исто така, посочи дека сериозни ги анализирал „главните тези“ на противниците на договорот меѓу двете земји во дебатите кои се водат во Македонија, Бугарија, но и во Србија.
– Главните точки се исти. Според мене, тие доаѓаат од Москва. Москва ја користи секоја прилика и секој начин да ја дестабилизира ЕУ. Најлесен начин за тоа е преку Балканот. Тука останува на бугарските политичари, независно од која политичка партија доаѓаат, да не одат по точките од една или друга сила, туку да направат дебата во парламентот за суштината на националната стратегија на Бугарија, изјави Плевнелиев.