Претседателот на Владата на Република Македонија, Никола Груевски испрати писмо со сочувство до бугарскиот премиер Пламен Орешарски поради големите поплави кои ја погодија Бугарија во кои загинаа повеќе лица, а е предизвикана и голема материјална штета.
– Дозволете ми, во овој тежок период за Република Бугарија, од мое лично име, и од името на граѓаните на Република Македонија да изразам длабоко сочувство за жртвите од поплавите. На семејствата кои ги загубија своите најмили, Ве молам да им пренесете дека сочувствуваме со нивната болка и дека нашите молитви и мисли се со нив, стои во писмото на Груевски.
Во духот на искрените и добрососедски односи кои ги имаме и во духот на солидарноста и пријателството на нашите народи, во оваа прилика, посочува премиерот, сакам да Ве известам дека можете целосно да сметате на помошта на Владата на Република Македонија.
– Подготвени сме во најбрз можен рок да ги ставиме на располагање сите потребни ресурси со цел санирање на штетите кои ги предизвика природната непогода. Упатувајќи го уште еднаш моето сочувство, дозволете ми да ја изразам мојата надеж дека набрзо ќе успеете да ја нормализирате состојбата и да ги надминете последиците од поплавите, се вели во писмото од премиерот Груевски до Орешарски.