Во Република Македонија владее хунта и хунтата само на сила се соборува и ние ќе ја собориме на улица, рече пред граѓаните кои протестираат пред Судот, поранешниот директор на Архивот на Република Македонија, Филип Петровски.
Тој побара ВМРО-ДПМНЕ да консолидира и радикализира.
– Ги повикувам сите членови на ВМРО-ДПМНЕ и сите месни комитети да се сплотат, да поставиме шатори овде пред Судот и пред Влада. Ќе има отпор од Македонците, рече Петровски.
Тој најави дека нема да го признаат Судот и тоа што Судот го прави доколку има недемократска процедура.
– На 27 април влеговме во Собранието да ја одбраниме државата од државниот удар кој го направи партијата која што сега е на власт, рече Петровски.
Тој рече дека сите граѓани заспале во Македонија, а се разбудиле во Белорусија и дека ова што го прави СДСМ и Зоран Заев е режим.
Петровски исто така ја повика најголемата опозициска партија да се повлече од Парламентот и сите останати институции.
Виктор Јованов