Претседателот и Врховен командант на вооружените сили Стево Пендаровски денеска одржа состанок со началникот на Генералштабот на Армијата на Република Северна Македонија генерал-потполковник Васко Ѓурчиновски, кој го брифираше за ангажманот на припадниците на Армијата на целата територија на државата во справувањето со последиците од епидемијата на Ковид-19, во услови на прогласена вонредна состојба.
Како што соопштија од кабинетот на претседателот, Пендаровски беше информиран и за проширените активности на Армијата во соработка со полициските сили, како и за поддршката што Армијата ја дава на цивилните структури, здравствените работници, Црвениот крст, Центарот за управување со кризи, Дирекцијата за заштита и спасување и локалната самоуправа.
Составен дел на денешниот брифинг, се посочува во соопштението, беше и ангажманот на Армијата на јужната и северната граница на земјата, каде армиските единици заедно со полициските сили се ангажирани за справување со потенцијално зголемен наплив на мигранти и бегалци како дел од „Балканската рута“.