Дневен центар за стари и возрасни лица беше отворен денеска во село Извор, Чашка. Во Дневниот центар ќе биде обезбеден и топол оброк за социјално загрозените лица од Народна кујна Велес.
На отворањето на Центарот присуствуваше и министерката за труд и социјална политика Мила Царовска.
-Со отворање на вакви дневни центри работиме на јакнење на социјалните услуги и за постарите лица. Ова се луѓе кои се грижеле за нас и го граделе нашето општество. Сега е наш ред да се грижиме за нив и да им овозможиме достоинствен и исполнет живот. Токму тоа го правиме со отворање на дневните центри, што нудат еден заеднички простор за дружба и рекреација за повозорасните лица, изјави Царовска.
МТСП го отвори Дневниот центар за стари и возрасни лица во соработка со Општина Чашка. За таа цел општината отстапи на користење сопствени простории, а министерството целосно го реконстуираше просторот и набави комплетна опрема со вкупна инвестиција од 900 илјади денари.
Дневниот центар е наменет за унапредување на квалитетот на живот и развивање на меѓусебната социјализација на повозрасните граѓани. МТСП продолжува да работи во насока на обезбедување подобри услови за повозрасните, како и помош на ранливите категории.