Здружениeто ЛГБТ Јунајтед во Македонија, го осуди вчерашниот инцидент пред одржување на „Маршот на толеранцијата“.
Во инцидентот двајца активисти и борци за права на маргинализираните заедници беа нападнати и истепани.
Кочо Андоновски, претседател на МАССО (Македонска асоцијација за слобода на сексуалната ориентација) и Марко Ковачевски се физички нападнати пред почетокот на Маршот на толеранцијата, кој се одржуваше по повод Меѓународниот ден на толеранцијата.
Андоновски и Ковачевски се нападнати од лица кои се противеле на организирање на ваква манифестиција и тоа во моментот кога лепеле плакати. Ковачевски се здобил со контузии, а Андоновски со полесни телесни повреди.
ЛГБТ Јунајтед ги повикува државните органи да реагираат согласно законите и надлежностите и да ги санкционираат сите кои поддржуваат каков било вид на насилство мотивирано од хомофобија или трансфобија.
Маршот се одржува по четврти пат, а годинава беше посветен на ЛГБТ популацијата во Македонија.
Воедно се даде и поддршка за жените погодени од говорот на омраза, а се апелираше и за почитување на законот за спречување и заштита од дискриминација и негова имплементација во реалноста.