Ученици од скопските основни училишта „Коле Неделковски“ и „Кузман Јосифовски-Питу“ денеска беа примени и имаа можност да разговараат со претседателот на државата Стево Пендаровски во “Вила Водно”, во рамки на активноста Отворен Кабинет.
Учениците имаа можност да се сретнат и лично да поразговараат со претседателот Стево Пендаровски, да се информираат за неговата работа и надлежности, а ги посетија и просториите во коишто се реализираат официјалните средби, како салите во коишто се организираат свечености, настани и прес-конференции.
Посетителите се запознаа и со дел од вработените во Кабинетот од кои беа информирани за историјатот на објектот во кој е сместен Кабинетот на Претседателот, како и за начинот на функционирање на оваа институција, соопшти Кабинетот на Претседателот.
Отворен Кабинет е активност што овозможува директни средби на граѓаните со претседателот Стево Пендаровски.
Сите заинтересирани граѓани, институции и организации, со претходно пријавување на официјалната интернет-страница на Претседателот http://pretsedatel.mk/otvoren-kabinet/ имаат можност да остварат директна комуникација со претседателот Пендаровски, да споделат свои идеи, предлози и сугестии, како и да присуствуваат на настани од јавен карактер што ќе бидат реализирани во Кабинетот.