Унгарија силно ја поддржува интеграцијата на Република Македонија во НАТО и во Европската Унија, а отвореното прашање со Грција не треба да биде пречка за почетокот на пристапните преговори со Унијата, истакна унгарскиот премиер Виктор Орбан по денешната средба со претседателот на макеоднската Влада Никола Грувески во Будимпешта.
Премиерот Груевски на средбата го информира Орбан за реформите кои се спроведуваат во Македонија, а кои беа позитивно оценети од страна на Европската Комисија во најновиот извештај за напредокот на земјата, и каде по четврти пат беше препорачано ЕУ да определи датум за почеток на преговори за членство на Република Македонија во Унијата.
Двајцата премиери ги констатираа одличните односи меѓу двете земји и истакнаа посветеност за нивно натамошно унапредување и продлабочување на секое поле од заеднички интерес.
Акцент е ставен на можностите за натамошно унапредување на економските односи, зголемување на економската соработка, трговската размена и инвестициите. Во таа насока Груевски и Орбан го поздравија денешното формирање на мешовитата македонско-унгарска комисија за економска соработка, за која оценија дека со својата работа значително ќе придонесе за интензивирање и динамизирање на економските односи меѓу компаниите од двете земји, како и на севкупната соработка меѓу Македонија и Унгарија.
Премиерите Груевски и Орбан разговараа и за ефектите и влијанијата од европската должничка криза и механизмите за надминување на предизвиците и овозможување на економски раст и развој. На средбата стана збор и за соработката во областа на образованието и културата.