Шест проекти од општините од истокот се во конкуренција за добивање грант од УНДП во износ од 33.000 евра.
Општините од источно планскиот регион денеска во Штип ги образложија своите проекти, а меѓу кои се енергетска ефикасност за Здраствениот дом во Македонска Каменица, изработка на техничка документација за изградба на мали акумулации во „Арамиска чешма“, изработка на техничка документација за цевковод со резервоар за вода во индустриската зона Чуката во Пехчево. Дел од проектите се и изградба на трета фаза на етно парк во Зрновци, потоа енергетски ефикасен објект за интернатот за децата со посебни потреби во виничкото село Блатец, а шестиот проект е стационар за кучиња.
Директорката на Центарот за развој на Источно планскиот регион, Драгица Здравева појаснува дека станува збор на проектот за унапредување на општинското владеење на УНДП и се работи за грант од 270.000 евра за сите осум плански региони во земјава.
– Значи секој центар треба да добие по 33.000 евра. Предлог проектите кои што денес ги разгледуваме на оваа еднодневна работилница, кога ќе се иселектираат три предлог проекти, одат на регионалниот совет. Седницата на регионалниот совет е закажана за 20 јули во Берово, каде што од три предложени предлог проекти може да се финансира само еден, вели Здравева.
Во наредните денови ќе се одлучи, кои три проекти ќе бидат доставени до Советот на градоначалници, а 11 градоначаници треба да одлучат кој проект, кој има регионално значење, ќе биде реализиран со грантот од УНДП.