Советот на општина Охрид не изгласа на дневен ред да се стави точката за помош за лекување на Сара Настоска од Охрид која боледува од малиген тумур. Предлогот беше општина Охрид да помогне со 1 милион денари за лекувањето, но со 17 гласа „Воздржан“ советот не го стави на дневен ред. Советниците на ВМРО-ДПМНЕ и СДСМ претходно имале консултации, вели градоначалникот Јован Стојаноски за „Макфакс“ и заеднички ја донеле одлуката.
„Тоа е едноставно поради законските ингеренции на општината. Фондот за здравство е институцијата која треба да помогне. Треба и ние да помогнеме, затоа сме организирале акции. Исто така, ако од буџетот еднаш се издвојат средства, ќе треба тоа да се прави за сите, бидејќи има и други болни лица“, вели Стојаноски за „Макфакс“.
На седницата беше изгласано да се обештетат рестораните чии платформи беа уништени од невремето на 17 март годинава. Според неофицијални информации, сумите за оштета на рестораните се движат по околу 1 милион денари. Советот изгласа елаборатите на рестораните кои имаа штети да се испратат во Влада, за да се исплати паричен надомест.
Кристијан Ландов
