Околу 1.250 матуранти годинава во Куманово ќе прослават матура. Градоначалникот на општината, Максим Димитриевски денеска им се обрати на дел од матурантите во спортската сала во средното училиште „Перо Наков“ и им порача на матурантите од различни етнички заедници од градот, заеднички да ја прослават матурата.
– Живееме во ист град, имаме заедничка визија – убаво, просперитетно Куманово и Македонија. Ќе мора различностите да ги искористиме како предност за градење заедничка иднина, рече Диитриевски.
Тој ги повика младите кумановци да собираат искуства, да се вложат себе си во посакуваната насока, да си постават зацртани цели и да ги реализираат, да ја сакаат државата и градот, да преземат мерки да се постигнат европски цели и квалитет на живот. Тој им се заблагодари на наставниците кои се вложиле за едукација на средношколците.
Димитриевски најави дека во Куманово, наредните денови ќе се одржи и танц за матурантите на градскиот плоштад.
Градоначалникот на Куманово ги покани матурантите на заедничка прослава на 31 мај во дискотека „Спејс“ на традиционална матурска забава која со години наназад ја организира општина Куманово.