Коалицијата „Сојуз за иднината“ предводена од СДСМ денеска повторно блокираше три крстосниците во главниот град искажувајќи незадоволство од случувањата на 24 декември.
Координаторот на пратеничката група на СДСМ Игор Ивановски најави дека денеска до Скопското јавно обвинителство ќе поднесат кривична пријава против претседателот на Собранието.
– Одговорноста мора да се понесе, политичка и законска, и од тие причини денеска до скопското јавно обвинителство ќе поднесеме кривична пријава против лицето Трајко Вељаноски, за злоупотреба на службената положба и овластување, потпишано од 42 пратеника, изјави Ивановски.
Иницијативите за формирање на комисија за дополнително утврдување на фактите Ивановски ја оцени како бегање од одговорноста на оние кои ги наредиле и спровеле настаните на 24 декември.
Според СДСМ, недозволиво е политичките претставници на ВМРО-ДПМНЕ да се кријат зад институциите кога треба да се соочат со одговорноста.