Обединетата македонска дијаспора (ОМД) во писмо до американскиот претседател Доналд Трамп бара тој да се заложи за членството на Република Македонија во НАТО за време на претстојната средба со премиерот на Грција Алексис Ципрас во Вашингтон.
– Од воспоставувањето на дипломатските односи во 1995 година, САД ја поддржуваат Република Македонија во нејзините напори за целосна евроатлантска интеграција. Република Македонија, од друга страна, е силен сојузник и поддржувач на САД во голем број мисии, вклучително во Авганистан. Грција го блокира членството на Македонија во НАТО. Претседателе Трамп, Вие имате одговорност да го браните интегритетот на НАТО како институција и да се осигурате дека им служи на заедничките интереси на евроатлансткото семејство, а не само на тесните интереси на една земја членка. Заложете се премиерот Ципрас да ја тргне блокадата за членство на Република Македонија во НАТО, како знак дека Грција е сериозна во намерата да биде регионален лидер, се вели во писмото на ОМД до американскиот претседател Трамп во пресрет на неговата средба со Ципрас во Белата куќа.
ОМД бараат претседателот Трамп наскоро да обезбеди и посета на висока американска делегација на Република Македонија.