Се е подготвено во Охрид да биде срушен Гинисовиот рекорд во најмногу приготвена рибја чорба. Учениците од Средното Угостителско училиште „Ванчо Питошевски“ од Охрид заедно со професорот по готварство Блаже Јорданоски завршија со сите подготовки.
Останува уште утре во 8 часот казанот специјално донесен за оваа намена да се запали и да почне варењето на чорбата која треба да биде готова до 14 часот.
За квалитетна чорба набавени биле 700 килограми риба, од кои 500 килограми се лосос и 200 килогрмаи се ослич. Потребни се и 110 литри масло, 100 килограми брашно, 2500 литри вода, 140 килограми морков, целер 50 килограми, 200 – 250 туфчиња магдонос.Треба да бидат приготвени 3,3 тони чорба.
„Вчера започнавме со варење на рибата, затоа што е многу голема количина. Навистина се работи за голема количина која што ќе се изработи овде во училиштето“, рече професорот Јорданоски.
Целиот чин на приготвување на рибјата чорба ќе се снима со неколку камери.Снимките потоа ќе бидат испратени во Гинис каде ќе се одлучува за рекордот.Ќе се дели на охриѓани, гостите, во хотелите, во општата болница и на социјалните случаи.