Боледувањето на адвокатот Асмир Алиспахиќ, бранител на дел од обвинетите во случајот „Монструм” го одложи денешното рочиште за петкратното убиство кај Смилсковото Езеро, во април 2012. Ова е второ рочиште по ред што се одлага, откако последното не се одржа од причина што друг бранител во постапката беше во самоизолација поради коронавирусот.
Случајот „Монструм” кој по одлука на Врховниот суд, повторно се суди во Кривичен суд Скопје, и моментално е во фаза на доказна постапка.
Судењето за овој предмет го води судијата Огнен Ставрев, додека застапници на обвинението се обвинителите Фатиме Фетаи и Гаврил Бубевски.
Во случајот „Монструм“, за петкратното убиство на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, се обвинети Алил Демири, Африм и Агим Исмаиловиќ, Фејзи и Хаки Азири и Сами Љута.