Институтот „Конфуциј“ при Универзитетот „Св. Кирил и Методиј“ денеска на платото пред Националната и универзитетска библиотека „Св. Климент Охридски“ во Скопје ќе го одбележи Светскиот ден на институтите „Конфуциј“ и 10-годишнината од основањето на првиот институт „Конфуциј“ во светот.
Како што информира УКИМ, на свеченоста ќе биде означен почетокот на манифестацијата „Запознај ги кинескиот јазик и култура“, која денеска од 11 до 18 часот ја организира Институтот „Конфуциј“ на платото пред НУБ „Св. Климент Охридски“.
Утре ќе се организира и на платото пред факултетите за општествени науки во универзитетскиот кампус. Посетителите на манифестација ќе имаат можност да присуствуваат на отворени часови по кинески јазик и калиграфија, да проследат изведби на таи чи чуан-вежби, кинеска музика, ѕид со пораки и други изненадувања.