Со положување цвеќе пред спомен-обележјето на Градскиот кеј во Охрид денеска беше одбележана петгодишнината од бродската несреќа на Охридското Езеро, кога при превртување на бродот „Илинден“ животот го загубија 15 туристи од соседна Република Бугарија.
Венци со цвеќе пред паметникот на жртвите положија делегација на Општина Охрид предводена од градоначалникот Никола Бакрачески, конзулот на Република Бугарија во Битола Чавдар Младенов, претставници на Здружението на граѓани „5 септември“, на Капетанијата на пристаништа од Охрид, како и гости присутни на комеморацијата.
Градоначалникот Бакрачески потсети на трагичниот настан на загинувањето на 15-те туристи од Бугарија, изразувајќи жалење за загубата. Тој најави дека во соработка со претставниците на бугарската држава во Република Македониа ќе се направи соодветно спомен-обележје во непосредна близина на местото каде се случи немилиот настан.
Бугарскиот конзул Младенов истакна дека лично многу му е тешко кога ќе се потсети на големата трагедија.
– Трагедијата е голема, навистина голема, болката е голема. Ние сме тука за да си помагаме, за да живееме заедно, рече Младенов, заблагодарувајќи се на Општина Охрид што го одржува споменот на настраданите во несреќата.
Бакрачески нагласи дека инцидентот иницирал крупни промени во начинот на регулирање на бродскиот сообраќај на Охридското Езеро, со значајно подигање на безбедноста, како за учесниците во сообраќајот, така и за капачите.
– Оваа година не е регистриран ниту еден случај на нарушување на безбедноста во сообраќајот на езерото, ниту каква било несреќа.
– Ние како локална власт, заедно со Капетанијата и Министерството за транспорт и врски, ќе бидеме силно посветени кон воведување идни мерки насочени кон подигање на безбедноста на повиско ниво, рече Бакрачески.
Несреќата на Охридското Езеро се случи на 5 септември 2009 година, кога бродот „Илинден“ потона на околу 250 метри оддалеченост од брегот во близина на автокампот „Елешец“. Притоа загинаа 15 од 56-те патници, туристи од соседна Бугарија, кои со „Илинден“ патуваа на излет во Свети Наум. Осум од жртвите беа жители на општина Антон, четворица од општина Пирдоп и по еден од општините Златица, Мирково и Рибарица.