Еден од браќата на Фејзи Азири, кој е обвинет за тероризам во случајот „Монструм“ денеска сведочеше во Основниот суд Скопје 1 на главниот претрес, во кој одбраната на обвинетите ги распитуваше сведоците на нивни предлог.
Во обид да му обезбеди алиби за кобниот 12 април, кога се случи петкратното убиство кај Смиљковското Езеро, братот на Азири потврди пред судот дека Фејзи ноќта кога се случило убиството имал работа со извесен Горан од Скопје, кому требало да му врати 1.600 евра, па затоа од фармата во Белимбегово преку скопската обиколница се упатил кон населбата Раштачки пат, последната станица на автобусот со број 8, каде живеел Горан.
Сведокот рече дека неговиот брат ноќта сам, со возилото голф 3 тргнал по обиколница да му однесе пари на Горан, а дома се вратил во 21.45 часот.
– Настанот беше на таков ден што не може да се заборави, а ние сме голема фамилија и кога разбравме за што се обвинети и анализиравме како е можно да ги обвинат луѓето кои на тој момент биле на работното мест, изјавува сведокот, пренесува Плусинфо.
Денеска како сведоци треба да бидат ислушани и братот на обвинетиот Алил Демири, како и другиот брат на обвинетиот Фејзи Азири.