Здружението „Зелена лупа“ поднесе нови 18 претставки за одговорност на судии до Советот за утврдување факти, меѓу кои и за судиите кои му овозможија на бизнисменот Сеад Кочан законска можност да излезе од притвор.
Новите иницијативи се против судии од Основниот суд Скопје I- Скопје, Апелациониот суд и од Врховниот суд. Иницијативите се поднесува за „несовесно работење со службата” и „злоупотреба на сл. должност и овластувања” поради суштествени повреди во текот на постапката во предметите по кои постапувале како судии.
Меѓу нив се првиот човек на Врховниот суд, Јово Вангеловски, и судиите Фаик Арлсани, Џемали Саити, Ристо Катавеновски и Рахилка Стојковска.
Иницијатива е поведена и против судијката Билјана Коцевска од кривичниот суд, потоа против судиите во Апелациониот суд, Зуица Наумова, Цветанка Периќ и Африм Фидани.
Претставки се поднесени и за судијката Моника Бахчовановска и Лидија Петровска, Милка Ангеловска-Васевска која досуди условна казна затвор за напаѓачите од Собранието, Џента Бектовиќ и Марина Станевски. Васко Тодоровски од Зелена лупа информираше дека инцијативи за утврдување одговорност на судии се поднесени и за претседателката на Апелациониот суд, Љиљана Шопова Ивановска, Татјана Дуковска, Зоран Димитриевски и Енвер Амзаи.