Армијата се развива, јакне, и она што е најважно како што гледаме денеска нашата Армија се подмладува. Вие денеска станувате дел од најценетата, најпочитуваната институција со најголема доверба во нашата држава, рече министерката за одбрана Радмила Шекеринска на денешниот прием на нови 70 професионални војници во касарната „Илинден“.
Шекеринска, како што соопшти Министерството за одбрана, истакна дека вложувањата во Армијата во изминатите три години придонеле првпат по долги години, интересот да биде исклучително голем.
-Првпат, за 70 места за војници имавме 750 кандидати, практично по 10 кандидати за секое место. Тоа покажува дека нашето вложување во институцијата, во подобри услови и опрема, веќе се забележува од страна на сите, порача министерката.
Шекеринска информираше дека во наредниве денови ќе биде распишан нов конкурс за прием на уште 200 професионални војници кои што покрај тоа што ќе ја подмладат Армијата, ќе создадат и нов капацитет во кој Армијата и Министерството ќе вложуваат.
-Приемот во НАТО, доаѓањето на Бригадата на Југоисточна Европа, новата опрема и зголемените плати во Армијата, придонесот во вонредната состојба, лидерското место во транспарентност и довербата кај граѓаните, направија 2020 година да биде наша успешна година во делот на одбраната, рече Шекеринска.
На свеченоста по повод приемот на новите војници присуствуваше и началникот на Генералштабот на Армијата, Васко Ѓурчиновски и командантот на касарната „Илинден“.
Со денешниот прием на 70 војници вкупната бројка на новопримени војници во изминатите три години изнесува 630.