Уште една аудио снимка на Зоран Заев во разговор со непознат соговорник е објавена денеска на Јутјуб, на канал со име „Партизани партизан“. Во разговорот, Заев одговара: „пет банки не вредат“, на коментарот на соговорникот: „А Шиптарите веќе ви ја пишат фактурата“.
„Не вредат на пазарот на гласови. Со избори и они ќе се валоризираат. Тие немаат роба позади себе за да пишуваат фактури“, вели Заев на снимката, која е објавена и во верзија на албански јазик.
Минатата недела, на Јутјуб се појавија разговори во кои се слуша соговорник со мутиран глас и Зоран Заев. Објавени беа две снимки, именувани како „Зоран Заев се договарал со Сашо Мијалков“ и „Заев знаел дека Шилегов правел криминал во второстепена комисија за јавни набавки“.
Во првата снимка соговорник со мутиран глас му вели на Заев дека Сашо е спремен за договор, по што добива одговор дека тој веќе се гледал со него. Понатаму, се зборува и за решенија кои Заев бара да се издадат од Финансиската полиција за завршена истрага во Општина Струмица, тврдејќи дека се е регуларно и според закон.