Посредникот на ОН во разговорите меѓу Грција и Македонија за спорот за името Метју Нимиц вчера во Њујорк одржа одвоени средби со претставниците на двете земји Адамантиос Василакис и Зоран Јолевски, јавија грчките медиуми.
За денеска е закажана заедничка средба по која ќе следуваат и изјави.
Во најавата за средбите на Нимиц, прес службата на ОН соопшти дека средбите се со цел да се процени статусот на разговорите и можноста да се направи прогрес во решавањето на прашањето за името.
Нема официјални најави дали Нимиц ќе излезе со нови конкретни предлози и идеи. Тој на почетокот на месецов изјави дека и натаму верува оти ако се направи обид на властите во Скопје и во Атина и ако се покаже добра волја, може да се дојде до решение за името во наредните месеци.