Предлог буџетот за 2013 година кој беше ставен на увид на јавноста уште еднаш потврдува дека тоа е буџет на долгови, кредити и буџет кој не нуди решение на голем дел од проблемите на граѓаните, рече денеска на прес конференција Марјанчо Николов од СДСМ.
„Иако владата планира во 2013 година да ги задолжи граѓаните на Република Македонија за нови 290 милиони евра и да го зголеми буџетскиот дефицит на 3,5 проценти се поставува прашањето каде ќе се трошат овие нови кредити. И во овој буџет нема предвидено средства за решавање на проблемот на вработените во ОХИС. Три недели вработените на оваа компанија штрајкуваат пред Владата заедно со вработените од Ремонт на пруги и никој од Владата не најде за потребно да ги прими и да им објасни што планира владата да прави со нив и нивната компанија. Владата не може да избегне од овој проблем затоа што таа е доминантен сопственик во ОХИС исто како што е и во ЕМО и во Тутунскиот комбинат во Прилеп“, рече Николов.