Преставникот на Обединетата македонска дијаспора (ОМД) за Канбера и Квинбеан во Австралија, Мартин Николоски оствари средба со новиот австралиски министер за одбранбен материјал почесниот Мајк Кели, во канцеларијата наменета за неговото гласачко тело во Квинбеан.
Д-р Кели е пратеник во федералниот преставнички дом на Едем-Монаро, каде живеат голем број Македонци со потекло од Охрид, Струга, како и од други делови на Македонија и Балканот.
Николоски појаснува дека министерот Кели ужива голема поддршка од страна на македонската заедница во Австралија. Тој ја поддржува австралиско-македонската парламентарна група за пријателство и има остварено средби со бројни македонски делегации.
Според Николоски, министерот Кели е свесен за важноста на стабилноста во Балканот, како и на добрите односи помеѓу Австралија и Македонија со создавање контакти помеѓу државјаните, но и помеѓу институциите на двете земји. Министерот Кели, во таа насока го потенцира и значајниот придонес на Макеоднија кон мировните мисии во Босна и Херцеговина, Косово, Ирак и Авганситан.
– На средбата со министерот Кели е разговарано за зајакнување и продлабочување на односите помеѓу Австралија и Македонија, како и помеѓу австралиската влада и македонската заедница во Австралија, рече Николоски.
Исто така, министерот Кели добил покана наскоро да ја посети Македонија со цел одблиску да се запознае со македонските институции, но и со напредокот што Македонија го има постигнато по осамостојувањето во 1991 година.
Обединетата македонска дијаспора работи во партнерство со сите сегашни и потенцијални австралиски пратеници од целиот политички спектар врз основа на нивната заложба за негување поблиски врски со Република Македонија и македонската заедница во Австралија.