Шефот на македонската дипломатијата, Никола Димитров заедно со министрите за надворешни работи од земјите во регионот, учествуваше на видео-конференција иницирана од еврокомесарот за проширување, Оливер Вархеји.
Министерот Димитров во своето обраќање се осврнал на актуелната состојба и мерките во земјата во контекст на пандемијата, како и во контекст на подготовките со цел демократски, фер и слободни предвремени парламентарни избори, со максимална заштита на здравјето на граѓаните.
Главен акцент во разговорите бил ставен на мерките коишто земјите од Регионот ги преземаат во функција на контролирање на пандемијата со коронавирусот, како и натамошната координација при нивно олеснување и овозможување на слобода на движење како во Регионот, така и меѓу земјите од Западен Балкан и ЕУ.
Од страна на еврокомесарот Вархеји била искажана подготвеност за поддршка на Регионот за контрола на вирусот, координација при следните чекори за закрепнување и повторно поврзување на Регионот со ЕУ во контекст на слобода на движење, каде што главниот критериум кој е препорачан при носење на одлуките е врз основа на објективната епидемиолошка слика.