Останува неизвесно дали од 1 февруари ќе почне примената на системот за санкционирање на сообраќајни прекршоци преку проектот „Сејф сити“, како што најави министерот за внатрешни работи Панче Тошковски. Причина за тоа е што сè уште не е обезбедено двотретинско и Бадентерово мнозинство во Собранието, потребно за усвојување на измените на Законот за прекршоците.
Опозициската Демократска унија за интеграција (ДУИ), предводена од Али Ахмети, засега не ги поддржува законските решенија што ги предлага власта, а за нивно усвојување е потребно и мнозинство од пратениците кои ги претставуваат заедниците.
Претседателот на Собранието, Африм Гаши, на денешниот брифинг изјави дека меѓу пратеничките групи сè уште не е постигнат договор за носење на измените на Законот за прекршоците.
„Доколку се постигне договор, измените веднаш ќе бидат ставени на собраниска седница за гласање. Досега на координациите немаше забелешки на текстот на законските измени. Прашањето е во политичкиот договор меѓу пратеничките групи“, рече Гаши.
Со предложените измени треба да се овозможи прекршоците евидентирани преку камерите на „Сејф сити“ да се доставуваат до возачите по електронски пат – преку СМС порака или електронска пошта.
Според законските решенија, сопственикот на возилото ќе добива известување со линк преку кој ќе може да го преземе записникот за сторениот прекршок и прекршочниот платен налог. Доколку известувањето не се отвори во рок од 24 часа, ќе следи второ известување, а по истекот на осум дена доставата ќе се смета за уредно извршена и без преземање на документот. Доставата ќе може да се врши и преку дигитална апликација.
Измените предвидуваат и построги санкции, меѓу кои трајно одземање на возилото за возачи затекнати под дејство на алкохол или дрога, како и престанок на важноста на возачката дозвола.