Вчера во текот на денот, непознат крадец ги однел теговите од три столба на железничката инфраструктура кај Кванташкиот пазар во скопската населба Маџари, по што целокупниот сообраќај на пругата бил во прекин неколку часа, соопшти полицијата.
„На 23.06.2021 околу 16.30 часот во СВР Скопје било пријавено дека на железничката пруга Маџари – Скопје, во близина на патниот премин кај Кванташки пазар, непознат сторител одзел тегови од три столба од контактната мрежа од инфраструктурата на Македонски Железници. Железничкиот сообраќај на тој дел од пругата бил во прекин до 21.30 часот кога биле поставени нови тегови“, велат од МВР, додавајќи дека се работи на расчистување на случајот.